Eske toujou gen apot apre 12 apot yo?
- Camille J. Ralph Datus
- 1 mars
- 3 min de lecture
Kesyon sou egzistans apot jodi a se yon sijè ki soulve anpil deba nan mitan kretyen yo. Bib la montre ke Jezi te chwazi 12 apot pou travay avèk li e pou kontinye misyon li apre li te moute nan syèl la (Matye 10:1-4). Men, apre lanmò ak rezirèksyon li, èske toujou gen apot? Pou reponn kesyon sa a, nou pral analize Bib la epi wè si apot yo te sèlman pou epòk Jezi oswa si gen apot toujou nan tan nou an.
12 Apot yo ak wòl yo
Jezi te chwazi 12 apot yo pèsonèlman. Misyon yo te gen twa aspè prensipal:
Yo te temwen Jezi pèsonèlman – Nan Travay 1:21-22, nou wè ke lè yo tap chwazi Matyas pou ranplase Jida Iskaryòt, youn nan kondisyon yo sete ke li dwe temwen rezirèksyon Kris la.
Yo te resevwa otorite Jezi – Jezi te bay apot yo otorite pou geri malad, chase demon, epi preche Levanjil (Lik 9:1-2).
Yo te fonde Legliz la – Apot yo te responsab pou mete baz Legliz Kris la sou tè a (Efezyen 2:20).
Apre 12 Apot yo, eske te gen Lòt?
Lè nou gade nan Nouvo Testaman an, nou wè ke gen lòt moun ki te rele "apot" apa de 12 orijinal yo. Pa egzanp:
Pòl – Li pat youn nan 12 yo, men li te resevwa apèl dirèk nan men Jezi sou wout Damas (Galat 1:1).
Barnabas – Travay 14:14 idantifye Barnabas kòm yon apot.
Jak frè Senyè a – Galat 1:19 montre ke li te konsidere kòm yon apot.
Sa montre ke tèm "apot" pa te limite sèlman ak 12 yo. Sepandan, moun ki te resevwa tit sa yo te gen yon apèl espesifik epi yo te temwen Kris nan rezirèksyon an.
Èske Gen Apot Jodi a?
Gen 2 opinyon prensipal sou kesyon sa a:
Non, pa gen apot ankò – Gen anpil moun ki kwè ke apre epòk biblik la, pa gen apot ankò paske:
Apot yo te fonde Legliz la epi yo te ekri Ekriti yo (Efezyen 2:20).
Pou yon moun ka apot, li te dwe temwen Jezi nan rezirèksyon an(Travay 1:22), sa ki enposib jodi a.
Wi, gen apot toujou – Gen lòt ki kwè ke gen apot toujou, men pa nan menm sans ak 12 yo. Yo panse ke apot yo se moun Bondye voye pou louvri nouvo zòn evanjelizasyon epi gide Legliz la. Yo baze opinyon sa a sou Efezyen 4:11-12 ki montre ke Kris te bay Legliz la apot, pwofèt, evanjelis, pastè ak ansèyman jiskaske nou tout rive nan inite lafwa.
Konklizyon
Pandan ke gen moun ki kwè ke wòl apot te fini ak premye syèk la, lòt moun kwè ke gen apot toujou, men yo pa gen menm otorite ak 12 yo. Sa ki sèten se ke apot orijinal yo te gen yon misyon esansyèl nan fondasyon Legliz la, epi Bib la montre ke Bondye kontinye mete moun apa pou travay li.
NB : Se pou nou toujou egzamine Ekriti yo ak lespri sajès pou konprann wòl lidè Legliz jodi a.
"Tout sa nou fè, se pou nou fè l ak lanmou" (1 Korentyen 16:14).
Mèsi paskew te pran titan pouw te gade avèk nou nap pi kontan toujou siw pataje l avèk yon lot moun 🙏
Siw ta renmen patisipe avèk nou nan gwoup ansèyman Bib la klike sou lyen sa 👇
Camille Jean Ralph Datus,
Pasteur, ing. Informaticien
Comments