Eske Yon Moun ki Fèk Konvèti ka Preche Levanjil?

Konvèsyon se yon chanjman espirityèl pwofon kote yon moun vire kite peche epi li aksepte Jezi Kris kòm Seyè ak Sovè li. Men, èske yon moun ki fèk konvèti, ki pa gen eksperyans ni temwanyaj solid, ka preche levanjil? Bib la ban nou plizyè prensip sou sa.

1. Tout Kretyen Gen Responsablite Pataje Levanjil

Lè yon moun vin konvèti, li vin yon disip Kris epi li resevwa misyon pou l pataje bòn nouvèl la ak lòt moun. Matye 28:19-20 di:

"Ale, fè tout nasyon tounen disip, batize yo nan non Papa a, Pitit la ak Sentespri a, epi montre yo pou yo obsève tout sa m te rekòmande nou yo."

Pawòl sa yo pa sèlman pou ansyen kretyen, men pou tout moun ki vin disip Jezi. Donk, menm yon moun ki fèk konvèti ka pale de lafwa li ak lòt moun.

2. Apot Pòl: Yon egzanp de moun kite fèk Konvèti ki Preche Touswit

Apot Pòl se youn nan pi bon egzanp nou genyen. Apre li te fin konvèti sou wout Damas la, li te imedyatman kòmanse preche levanjil. Travay 9:20 di:

"Li te imedyatman kòmanse preche nan sinagòg yo, li t ap di: ‘Jezi se Pitit Bondye a’."

Sa montre ke, menm si yon moun fèk konvèti, li kapab temwaye sou Jezi ak lòt moun.

3. Bezwen Moun ki gen plis Matirite Pou Fòme Nouvo Kretyen

Menm si yon nouvo kretyen ka pataje levanjil, sa pa vle di li dwe mennen yon legliz oubyen vin yon lidè san fòmasyon. 1 Timote 3:6 di ke yon lidè pa dwe yon nouvo konvèti:

"Li pa dwe yon nouvo konvèti, pou li pa vin awogan epi pou satan pa jete l anba menas li a."

NB : Se poutèt sa, kelkeswa nivo oubyen dimansyon nouvo konvèti a ta genyen. Li enpòtan pou nouvo kretyen yo grandi nan lafwa epi resevwa disiplin nan men moun ki gen plis eksperyans.

4. Temwayaj Pèsonèl : Yon Fòs Pou Pataje Levanjil

Menm si yon nouvo kretyen pa gen eksperyans espirityèl pwofon, li toujou gen temwayaj li ka pataje. Nonm Jezi te geri a nan Jan 9:25 te di:

"Yon sèl bagay mwen konnen, mwen te avèg, kounye a mwen wè."

Menm jan an, yon nouvo konvèti ka di: “Mwen te pèdi, men Jezi sove m.” Sa a se pou l ede lòt moun.

Konklizyon

Wi, yon moun ki fèk konvèti ka preche levanjil, paske li resevwa misyon sa a lè li vin disip Jezi. Sepandan, li dwe kontinye grandi espirityèlman, aprann nan men kretyen ki gen plis matirite, epi evite vin lidè twò bonè. Chak kretyen, nouvo oswa ansyen, gen yon wòl pou jwe nan travay Bondye.

Si ou fèk konvèti epi ou vle preche levanjil, ou ka kòmanse ak temwayaj ou, li Bib la regilyèman, epi chèche direksyon nan men Bondye ak ansyen kretyen yo.

Mèsi paskew te pran titan pouw te gade avèk nou nap pi kontan toujou siw pataje l avèk yon lot moun 🙏

Siw ta renmen patisipe avèk nou nan gwoup ansèyman Bib la klike sou lyen sa 👇

https://chat.whatsapp.com/IBqEYpamYn8Lsc1Zq5gE0n

Camille Jean Ralph Datus,

Pasteur, ing. Informaticien